En l’Asociación Cultural Nogará – Religada pensamos que pa poder normalizar una luenga, cal vivir-la. Per ixo, queremos que l’Asociación Cultural Nogará – Religada siga un puesto an que poder vivir la luenga. Organizamos tota mena d’actividaz an que poder fer servir la luenga aragonesa, pa que personas aragonesofablants u afíns puedan usar-la como luenga vehicular mientres ascuitan mosica, asisten a una charrada u realizan una excursión per lo nuestro territorio, per eixemplo.
Entre las actividaz que se realizan, i hai:
- Cursos y tallers.
- Chornadas de sensibilización.
- Actividaz ludicas: excursions, fiestas, conciertos…
- Estudeyo y investigación de campo, asinas como documentación.
- Intercambio cultural con atros grupos d’o país u d’atros ambitos.
- Actividaz especificas pa la población más choven.
- Y cualsequier actividat que nos aduye a convivir en aragonés.
Manimenos, una d’as nuestras actividaz prencipals ye la ensenyanza d’a luenga aragonesa. Contamos con 3 libels d’aprendizache, con cursos presencials y online. Y tamién realizamos cursos de luenga aragonesa en colaboración con atras entidaz y institucions. Consulta la nuestra Escuela d’Aragonés.
Activismo cultural
L’Asociación Cultural Nogará – Religada se caracteriza per la suya gran actividat y participación en eventos de l’ambito cultural. Per un costau, se realizan prochectos propios de gran relevancia, como O Zaguer Chilo, la creyación de recursos en luenga aragonesa u lo doblache d’o primer largometrache a l’aragonés. Per unatro costau, tamién se treballa per medio de mecenache de prochectos culturals de personas socias.
La colaboración con entidaz afíns nos permite crear un ret de colaboración que permite desenvolver prochectos de forma conchunta, como la organización de fiestas y semanas culturals, traducción de documentos graficos (libros, campanyas publicitarias) u audiovisuals (muestras de cine).
Prou que sí, siempre emparando y habendo en cuenta lo talento d’artistas y creyadors aragoneses.
Activismo politico
Como parte d’as fins de l’Asociación Cultural Nogará – Religada, la defensa d’a luenga y cultura aragonesas ye un d’éls. Ixe prencipio basico de l’asociación ha feito que siamos una entidat muito celosa de l’actividat politica respective a la luenga aragonesa, entendendo-la no como la luita per bella cosa d’a nuestra propiedat, sino como la luita per un bien cultural propio d’a nuestra cultura aragonesa y lo nuestro pueblo. Un bien cultural que no ha d’estar maltratau como se ye maltratando.
Esta actitut responsable y de respecto enta la luenga aragonesa, con una percepción global d’a mesma, ha moviu a l’Asociación Cultural Nogará – Religada a lo largo d’a suya historia a embrecar-se en a promoción de procesos participativos pa la unidat d’a luenga pa acullir distintos puntos de vista y sensibilidaz, como estió Chuntos por l’aragonés y lo II Congreso por l’aragonés.
En l’actualidat, l’Asociación Cultural Nogará – Religada, como actor social, sigue denunciando cualsequier abuso que detecta en contra d’a luenga aragonesa y d’os dreitos d’os suyos parladors.
Asociación Cultural Nogará - Religada 