L’Asociación Cultural Nogará – Religada, reunida en Asembleya Extraordinaria, ha aprebau per unanimidat l’adopción d’a norma ortografica oficial de l’aragonés de l’Academia Aragonesa d’a Luenga seguntes l’ACUERDO NORMATIVO 2/2023, de 3 d’abril de l’Academia Aragonesa d’a Luenga, publicada en o BOA de 20 d’abril de 2023.
L’Academia Aragonesa d’a Luenga ye la sola institución que tiene l’autoridat de “Establir las normas referidas a l’uso correcto d’as luengas y modalidaz lingüisticas propias d’Aragón”, entre las cuals s’incluye la luenga aragonesa. Seguindo lo principio de respeto a las autoridaz competents en materia de luenga, Nogará ha aprebau adoptar la normativa ortografica oficial aprebada per l’Academia Aragonesa d’a Luenga y fer-la propias. Asinasmesmo, anima a aquellas asociacions y institucions relacionadas con a luenga aragonesa a que adopten la normativa oficial y se deixen a un costau las discusions entre asociacions y s’emplegue la mesma grafía, pa treballar en os aspectos que se consideran prioritarios pa l’aragonés: la ensenyanza, la difusión, la normalización d’o suyo uso en toz os ambitos.
Nogará leva mas de 30 anyos treballando per la ensenyanza, promoción y dignificación d’a luenga aragonesa. Uno d’os obchectivos prioritarios ha estau siempre la busqueda d’a unidat y la desfensa d’a suya diversidat. Entre este tiempo, s’ha treballau duro per fer-lo posible, promovendo iniciativas de dialogo y consenso, y denunciando los abusos que s’han realizau en contra d’a luenga.
Aragón, a 23 d’abril de 2023
Asociación Cultural Nogará 