Nogará, en a suya faina por normalizar l’uso de l’aragonés y fomentar a creación de materials en esta luenga emprendió un prochecto con Sonilab fa un alto u baixo un anyo.
Este prochecto, empentau dende la suya colla de pais y mais Ninogará, miraría de doblar o primer largometrache en aragonés. Esta vegada se tractaría d’una cinta d’animación infantil “Albert”, y en colaboración con a interpresa de doblache Sonilab en Sabadell (Bcn).
Mientres estos meses o treballo ha estau intenso, no sin entrepuces, y gracias a la rasmia d’as socias/os y colaboradors de Nogará. Belunas d’ellas, como Silvia Cebolla (presentadora d’Aragón Tv), u l’historiador medievalista de l’aragonés Guillermo Tomás, tamién o periodista de La Sexta Jorge Romance, … han metiu voz a os divertius personaches d’Albert. Encara que la gran mayoría han estau doblaus por autenticos profesionals d’o doblache, que han dau un resultau que no tiene cosa que envidiar a las cintas dobladas en castellano u catalán, que somos feitos a veyer en as canals de Tv publicas u privadas.
Esta semana damos o pistoletazo de salida d’a suya presentación y reproducción con este trailer que adchuntamos.
Albert ye una película danesa que ha replegau quántos exitos y reproduccions, y que ha estau doblada a o castellano, catalán y euskera. A historia d’a chicota ciudat de Kellytown, la mas amigable d’o mundo, a lo menos dica que i plegan Albert y Egon, uns chovens borinotz. Os dos fuyen d’o lugar en busca d’aventuras per o mundo real, que les permitan apanyar lo danyo causau.
A partir d’este viernes será disponible en a plataforma Filmin, y bien luego informaremos de mas iniciativas y presentacions d’a cinta.
L’obchetivo, igual que lo de Ninogará y la propia Nogará, ye que as ninos/os que tienen l’aragonés como primera u segunda luenga, dispongan de material pa normalizar o suyo uso. De vez, asperamos que sirva d’eixemplo a las administracions publicas y Aragón Tv, y contrimostrar que materials de calidat en aragonés son posibles, d’a mesma traza que n’i hai pa o castellano, catalán u anglés.
Tanimientres tos deixamos con o tráiler que hemos penchau en a nuestra canal de YouTube:
Asociación Cultural Nogará 