La televisión publica ha oblidau de nuevo la musica en atras luengas d’o Estau Espanyol
Televisión Espanyola (TVE) ha emitiu un programa especial pa celebrar la dentrada en o nuevo anyo 2023. En esta programación musical en a quala amaneixen diferents interpretacions en diferents estilos, nomás i hai habiu presencia d’o castellán; en contraposición con a realidat lingüistica d’o Estau en o qual i hai 6 luengas (oficials u no) que conviven con o mesmo (catalán, occitano aranés, aragonés, euskera, asturiano y gallego), pero en ixe programa nomás i hai habiu presencia d’a luenga castellana.
Las organizacions de reivindicación lingüistica (lista) consideramos que ye una total falta de consideración per parte de Radiotelevión Espanyola en no tener en cuenta a las diferents luengas d’o Estau en este programa. Amás, ixa presencia monolingüe chenera una minusvaloración d’os diferents artistas y grupos que fan musica (en os suyos diferents estilos) en as luengas diferents a lo castellán.
Esta falta de creyacions musicals en as diferents luengas d’o Estau (oficials u no) suposa un greuche a la realidat multilingüe y multicultural d’Espanya, que amás choca con a propia Constitución Espanyola que en o suyo articlo 3.3 fa mención a la diversidat lingüistica (“La riqueza d’as distintas modalidatz lingüisticas d’Espanya ye un patrimonio cultural que será obchecto d’especial respecto y protección).
Reclamamos a RTVE un mayor respecto a la diversidat lingüistica, y a las musicas feitas en as diferents luengas d’o Estau. Resulta increyible que un ente publico amague de forma deliberada la pluralidat y realidat lingüistica d’Espanya.
Las organizacions que nos chuntamos en este comunicau presentaremos conchuntament una reclamación a RTVE pa acabar con esta discriminación a los nuestros idiomas pa que la televisión publica d’o Estau tienga respecto, consideración y sensibilidat pa las luengas d’o Estau.
Asociación Cultural Nogará 