25% d’as clases en aragonés y catalán en Aragón

Dimpués de l’obligación d’o TSJC pa que o castellano figure en un 25% d’as clases en Catalunya, demandamos o mesmo tracto pa aragonés y catalán en Aragón

O zaguer 21 de chinero, o Tribunal Superior de Chusticia de Catalunya ratificó a sentencia que obligaba a impartir un 25% de castellano en as aulas catalanas.

A sentencia inicial ya consideraba en aviento que l’emplego d’o castellano yera “residual” en ditas cambras, en virtut d’a Lei Organica LOMLOE que considera que “Las Administraciones educativas garantizarán el derecho de los alumnos y las alumnas a recibir enseñanzas en castellano y en las demás lenguas cooficiales en sus respectivos territorios …” en as comunidatz con un segundo idioma oficial.

Dende o movimiento de desfensa d’una luenga minorizada como l’aragonesa, declarada como Luenga Propia en a “Ley de Uso, Protección y Promoción de las lenguas propias de Aragón” por o suyo Parlamento Autonomico, nos preguntamos si ixa mesma lei desfiende tamién os dreitos d’os suyos parladors/as.

Femos memoria que l’aragonés nomás s’imparte como asignatura optativa y/u extraescolar en bells 50 centros escolars de Primaria. Centros d’a zona declarada por a dita Lei d’uso, protección y promoción de l’aragonés, y nomás en 2 Institutos, tamién como optativa.

A duración de ditas clases, optativas u extraescolars (no tot l’alumanu la recibe) no pasa d’os 45 minutos, y como muito 2 vegadas a la semana. Amás, en pasar os dos primers cursos, entra en competencia con a elección d’asignaturas como francés u taller de refuerzo. Provocando una incompatibilidat con estas, que son afavoridas por o suyo emponderamiento en os medios de comunicación y requerimientos curriculars.

Fendo cuentas, plegamos a la conclusión de que l’uso d’ista luenga protechida y en peligro de desaparición no arriba a o 4% (2/30) d’a duración de l’horario escolar, ixo en o caso de que siga eslechida por l’alumno en a suya triga d’optativas u extraescolars.

Por ixo, queremos denunciar debant d’a sociedat aragonesa la situación de greuche existent en o sistema educativo pa l’aragonés y lo catalán en Aragón, una situación que sí que ye humillant y marguinal, y animamos a los pais y mais aragoneses a denunciar-lo.

O zaguer 19 de noviembre, as Cortz d’Aragón (PSOE/PP/PAR/Vox) aprebaban una Iniciativa de Cs en a que s’instaba a “l’emplego d’o castellano como luenga vehicular en toda Espanya, d’alcuerdo a la Constitución Espanyola y los Estatutos de Autonomía”, en clara alusión a la situación de Catalunya y pa denunciar precisamente esta supuesta “residualidat” d’o castellano en a comunidat vecina.

Dende Nogará veyemos con preocupación que garra asociación de mais y pais, profesoras, partius politicos u movimiento por os dreitos lingüisticos haiga denunciau ista situación en Aragón. Creyemos que i hai una motivación política por impulsar o monolingüismo dezaga de toda ista litarrada de noticias y desinformación. La mesma motivación que dende fa decadas ye levando a la desaparición de l’aragonés, con a suya diglosia y marguinación en a escuela.


Deja una respuesta

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Salir /  Cambiar )

Imagen de Twitter

Estás comentando usando tu cuenta de Twitter. Salir /  Cambiar )

Foto de Facebook

Estás comentando usando tu cuenta de Facebook. Salir /  Cambiar )

Conectando a %s