Hemos ubierto una finestra, con a intención d’ubrir-las totas

  • Representants d’as entidatz que fomentoron la Proposición no de Lei han realizau una comparecencia simultania en Bilbo (Euskalgintzaren Kontseilua), Santiago (AMESA), Valencia (ACPV, Escola Valenciana y Plataforma per la Llengua), Zaragoza (NOGARA) y Xixón (Iniciativa pol Asurianu).
  • S’han reafirmau en o compromiso de seguir treballando conchuntament

En primer puesto, lo secretario cheneral de Euskalgintzaren Kontseilua, Paul Bilbao, ha subrayau en nombre d’os achents que, tot y con estar un paso chicot, lo debat s’ha tresladau a parametros adequaus y centrals: “D’una vegada per totas, hemos aconseguiu debatir la chestión d’as luengas propias en función d’os parametros de chusticia, igualdat y libertat. Perque, como diciemos en Madrid, ye en chuego la democracia si millons d’habitants d’o Estau son consideraus ciudadans de segunda”

Chunto a ixo, Bilbao ha feito hincapié en a responsabilidat y la flexibilidat d’os achents: “Per la nuestra parte i hai habiu una disposición total pa plegar a consensos, per ixo nos resultó incomprensible que se nos pedise que renunciasenos a lo prencipio d’a igualdat lingüistica. Manimenos, y encara que pareixeba que s’iba a refusar tota la propuesta, finalment, gracias a la presión que exerciemos, aconseguimos ubrir bella finestra. No tanto como querébanos, pero hemos ubierto una brecha”.

Asinasmesmo, Bilbao ha quiesto subrayar que mesmo dende Europa s’ha insistiu recientment en a necesidat que lo Estau cambie lo rumbo d’a politica lingüistica: De feito, fa una semana lo Comité d’Expertos d’o Consello d’Europa ha publicau un nuevo informe sobre la Carta Europea d’as Luengas Rechionals u Minoritarias y ha reiterau que lo Estau ha incompliu una serie de recomendacions: “Las recomendacions incomplidas se vinculan dreitament a las medidas que estioron refusadas en a Proposición no de Lei. Nos pareixe, per tanto, que si i hai voluntat, lo Estau compliría facilment los tractaus internacionals ratificaus, precisament per la vía que le proposemos los achents” ha sinyalau lo representant de Kontseilua.

Finestra ubierta

Contino, los achents han detallau la repercusión que pueden tener los puntos aprebaus per lo Congreso d’os Deputaus. D’este modo, lo representant d’Iniciativa Pol Asturianu, Iván Llera, ha feito una valoración sobre lo punto que s’ha aprebau arredol d’a oficialidat: “Per lo que fa a la nuestra luenga, suposa un gran empento a la nuestra labor y, per tanto, a l’actitut d’os partius que desfienden la oficialidat en a Xunta Xeneral. Lo Gubierno asturiano manifestó en quantas ocasions que en setiembre de 2021 encetaría lo proceso de reforma d’o Estatuto d’Autonomía. Agora podremos incrementar la presión debant d’os partius que emparan la oficialidat pa ubrir quanto dinantes lo debat sobre la reforma d’o Estatuto, asinas como pa reconoixer a lo gallego ixe estatus en os consellos de Eo-Navia “.

Asinasmesmo, Llera ha recordau que este punto d’a oficialidat tamién afecta a atras luengas: “Se puede aprofitar pa introducir en o Estatuto d’Aragón la oficialidat de l’aragonés y d’o catalán, tenendo en cuenta que, en breu, se reformará lo Estatuto. En o caso de Navarra, cal recordar que la luenga no ye oficial en tot lo territorio y lo punto aprebau atiende tamién a este tipo de casuística. Per tanto, habría de contribuyir a empentar la reforma d’o Amejoramiento pa extender la oficialidat a tot lo territorio. Y, d’a mesma traza puede valer pa atros territorios, como lo gallego en Berzo, Seabra y Portelas (Castiella y Leyón) y Xálima (Estremadura); lo catalán en Carx (Murcia); y l’euskera en Treviño (Castiella y Leyón) y en Trucios (Cantabria)”.

La segunda medida aprebada per lo Congreso espanyol se refiere a l’uso administrativo d’as luengas entre territorios d’un mesmo ambito lingüistico y a la recepción de meyos de comunicación. La suya valoración la ha realizau Alexandra Usó secretaria de Escola Valenciana: “Per lo que fa a lo catalán cal aconseguir que no i haiga impedimentos pa lo suyo uso, encara que lo nombre d’a luenga sía diferent en cada territorio, seguntes las ordinacions, catalán en Catalunya y Islas, valenciano en Valencia. Caldría pedir que lo valenciano y lo catalán sían denominacions equivalents y lo texto habría de servir pa pedir a la Abogacía d’o Estau que no torne a meter en qüestión la deseparación lingüistica “

En segundo puesto, Toni Gisbert, secretario cheneral de ACPV, s’ha referiu a la reciprocidad d’os meyos de comunicación:” Si atendemos a este punto, se puede concluyir que lo Gubierno central se compromete no nomás a no impedir-lo activament, sino tamién a facilitar ixa reciprocidad a traviés d’o segundo múltiplex pa que estas canals no dentren a cargo d’os operadors de televisión con licencias “.

Chunto a ixo, lo representant d’a ACPV ha explicau que este punto tamién habría d’afectar a atras luengas: “Lo gallego forma parte d’un ambito lingüistico mas amplio, lo gallego-portugués, deseparau per las buegas administrativas d’os estaus en a Peninsula Iberica. Tot y con as diferents reglas ortograficas pa las variants gallega y portuguesa, la reciprocidad en a recepción de meyos de comunicación y audiovisuals aduyaría a conoixer millor entre los hablantes estas variants y a reconstruyir-las a traviés de modelos de verdadero gallego. Y, per lo que fa a l’euskera, que lo punto aprebau sirva pa que d’una vegada per totas se puedan veyer las cadenas en euskera de EITB en tota Navarra “

Lo tercer punto aprebau per lo Congreso d’os Deputaus ha estau valorado per lo president de AMESA, Marcos Maceira. Hemos de recordar que este punto exiche que se guarencie un respecto real, que sía basau tanto en os dreitos como en as obligacions y en l’actuación compromesa de totz los poders d’o Estau.

Perque dende la diferencia establida per la Constitución entre lo dreito d’uso y lo deber de conoixencia (nomás pa lo espanyol) dica 500 disposicions legals de distinto rango churidico, ye evident la diferencia entre la luenga oficial d’o Estau y as de demás luengas propias de cada territorio. D’este modo, lo representant de AMESA ha sinyalau que a este punto, aprebau per una amplia mayoría, se le han d’anyadir atras obligacions asumidas per lo Estau, entre ellas tractaus internacionals como la Carta Europea d’as Luengas Rechionals u Minoritarias u la Declaración Universal d’os Dreitos Lingüisticos. “Pa que este punto pueda complir-se, cal eliminar las limitacions imposadas en a lechislación a l’uso d’as luengas propias de cada territorio y aplicar-las indirectament a tota la normativa que s’aprebe a partir d’agora”, ha dito Marcos Maceira.

Necesidat d’ubrir nuevas finestras

Contino, Francesc Marco, representant de Plataforma per la Llengua, ha recordau que encara que s’ha ubierto una finestra, han deixau zarradas intencionadament atras: “Nos resulta incomprensible que qualques partius no haigan amostrau una verdadera firmeza, como diciemos en Madrid, pa dar inicio a un nuevo modelo de chestión lingüistica basau en a chusticia y la igualdat”

De feito, como ha sinyalau Marco, lo Congreso ha refusau los puntos que ofriban la posibilidat de meter fin a l’actual inchusticia. “No s’han quiesto reconoixer los mesmos dreitos y obligacions a totz los ciudadans, no han acceptau exichir lo conoixencia d’as luengas propias a lo personal d’as administracions publicas, no han quiesto que se suspenda la imposición legal d’o castellán que ye en a normativa estatal. Sin dubda las medidas estructurals han estau refusadas y per tanto, hemos de decir que encara i hai partius que son luen d’estar a favor d’a igualdat real”.

Mirada de futuro

Pa finalizar, Chuserra Barrios de NOGARA ha dau cuenta d’os siguients pasos. “Encetamos este camín de colaboración fa dos anyos y tenemos intención de continar con determinación”, ha explicau. D’este modo, Barrios ha explicau que enchegarán dos linias de treballo immediatas: “Per un costau, cada luenga activará dinamicas propias en o suyo territorio pa que s’apliquen en a mayor brevedad posible las repercusions d’os puntos aprebaus. Per unatro costau, la nuestra labor será interpelar a lo Gubierno espanyol “.

Hemos de tener en cuenta que lo Congreso d’os Deputaus ha realizau un mandato a lo Gubierno pa complir los tres puntos mencionaus. Per tanto, agora lo Gubierno habrá d’explicar qué y cómo lo va a fer. “La nuestra labor ye interpelar y presionar a lo Gubierno pa complir lo mandato, y per ixo imos a pedir en primer puesto una reunión con Ministro de Politica Territorial d’o Gubierno d’Espanya, perque s’enmarca dentro d’as suyas competencias, entre atras, la Usina d’as Luengas Oficials. “

Lo representant de NOGARA ha abanzau que los achents preveyen que la reunión será en plazo breu: “No pueden obviar a los prencipals achents que treballamos per las luengas propias, mas encara, tenendo en cuenta que recientment lo Comité d’Expertos d’o Consello d’Europa ha tornau a pedir a lo Gubierno que tienga en cuenta las opinions d’estes achents. La nuestra intención, como dica agora, ye actuar con responsabilidat y creyemos que ye hora de dar pasos firmes “, ha anyadiu.

En Bilbao, Santiago, Valencia, Zaragoza y Xixón 8 de abril de 2021

Texto integro AQUÍ


Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Salir /  Cambiar )

Google photo

Estás comentando usando tu cuenta de Google. Salir /  Cambiar )

Imagen de Twitter

Estás comentando usando tu cuenta de Twitter. Salir /  Cambiar )

Foto de Facebook

Estás comentando usando tu cuenta de Facebook. Salir /  Cambiar )

Conectando a %s