IGUALDAT Y LIBERTAT EN AS NUESTRAS LUENGAS

Las personas que sinyan este articlo representan a entidatz que treballan per la
normalización d’as luengas minoritarias en Espanya. Nos enfocamos en as nuestras sociedatz
con diferents prochectos y iniciativas, pa aconseguir, entre atros obchectivos, lo dreito a vivir en
a luenga d’os nuestros territorios.

Somos conscients de que la iniciativa social ha d’ir acompanyada de politicas lingüisticas
y midas eficaces. Per ixo, fa dos anyos decidiemos d’iniciar una iniciativa conchunta con
l’obchectivo d’incluyir en o debat politico la garantía d’os dreitos lingüisticos en os nuestros
territorios con a presentación d’o documento Pluralidat lingüistica: libertat, igualdat y
democracia an que clamamos a los partius a asumir los principios d’a igualdat lingüistica, pa
asegurar una sociedat chusta, verdaderament plural y democratica con dreitos y debers
efectivament iguals pa totz.

Como resultau, diez organizacions politicas han refirmau estas demandas presentando en
aviento una proposición no-de-lei que estió debatida en o Congreso lo 9 de marzo.

Lo 45% d’os habitants d’o estau espanyol viven en territorios con luengas propias diferents
a lo espanyol. Luent d’estar un simple dato estatistico, ye una realidat que en a practica obliga
a l’uso d’o espanyol pa complir obligacions, satisfer necesidatz y respectar atros dreitos. L’uso
d’os nuestros idiomas se troba siempre con a paret d’a exclusión, la coacción, lo veto, la
inexistencia, la invisibilidat u con condicions imposibles baixo lo emparo d’o Boletín Oficial d’o
Estau.

Dende la Declaración Universal de Dreitos Humans dica la Declaración Universal de
Dreitos Lingüisticos, dende lo Pacto Internacional de Dreitos Civils y Politicos dica la Carta
Europea d’as Luengas Rechionals u Minoritarias, acuerdos internacionals con os quals lo Estau
espanyol ye compromeso, en totz ells i hai coincidencia en que totz los pueblos y las comunidatz
lingüisticas, iguals en capacidatz, han d’estar tamién iguals en o dreito a fer totas las actividatz
humanas en o suyo propio idioma. Igualdat, libertat y democracia con voluntat d’exercicio.

La voluntat d’as entidatz socials de dialogar y arribar a un acuerdo acceptando totas las
propuestas alternativas a la nuestra, con a sola condición de tener como base la igualdat de
totas las comunidatz lingüisticas, y la voluntat de meter-la en practica y implementar accions
concretas s’ha trobau, d’una man, con un PP que presentó una esmienda que reconoixeba la
necesidat d’a igualdat de dreitos y debers, pero seguiba imposando limites que vuedaban la
propuesta de voluntat practica y, d’atra man, con un PSOE zarrau a lo reconoiximiento mas
basico d’a plena igualdat de totas las luengas existents en o Estau.

Lo feito de que los dos partius que han presidiu lo Estau en es zaguers quaranta anyos
haigan manteniu la suya posición habitual no ha permitiu d’arribar a un compromiso con totz
los puntos d’a propuesta, pa pasar d’a politica declarativa a la executiva y, en conseqüencia, dar plena vichencia a los pactos sinyaus per lo propio Estau, pero finalment s’han aprebau tres d’as
midas contempladas.

No tenemos garra dubda de que ixo ha estau posible gracias a la presión d’os achents
socials, ni de que, mesmo con un resultau insuficient, hemos aconseguiu reubrir lo debat,
asentar-nos y dialogar con qui i han estau disposaus. Hemos definiu lo camín y hemos
aconseguiu que se i adhieran nuevos achents politicos, dica d’agora insensibles a demandas tant
fuertes y tant necesarias en as nuestras sociedatz.

Hemos ubierto una finestra, pero lo futuro d’as nuestras luengas precisa que se’n ubran
muitas mas y que nunca no se tornen a zarrar. Insistiremos y seguiremos actuando dende las
nuestras diversas realidatz, pero tamién coordinaus en totz los espacios que podamos en a
busqueda d’una democracia real que refuse tota mena de racismo, incluyiu lo lingüistico, que
desprecia, excluye y discrimina ciudadanos per estar miembros d’una comunidat lingüistica.

Marcos Maceira Eiras – President d’a Mesa pola Normalización Lingüística (Galicia)
Paul Bilbao Sarria – Secretario Cheneral de Euskalgitzaren Kontseilua
Òscar Escuder i de la Torre – President d’a Plataforma de la Llengua
Iván Llera – President d’Iniciativa pol Asturianu
Eduardo Laga Lázaro – Secretario de l’Asociación Cultural Nogará-Religada (Aragón)
Natxo Badenes – President d’Escola Valenciana
Toni Gisbert – Secretario d’Acció Cultural del País Valencià
Òmnium Cultural


Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión /  Cambiar )

Google photo

Estás comentando usando tu cuenta de Google. Cerrar sesión /  Cambiar )

Imagen de Twitter

Estás comentando usando tu cuenta de Twitter. Cerrar sesión /  Cambiar )

Foto de Facebook

Estás comentando usando tu cuenta de Facebook. Cerrar sesión /  Cambiar )

Conectando a %s